
那洛巴大师教言集NARO29བར་དོ་ཞེ་སྡང་རྡོ་རྗེའི་ཤོག་རིལ།
1-4-49a

༄༅། །བར་དོ་ཞེ་སྡང་རྡོ་རྗེའི་ཤོག་རིལ།
༄༅། །བར་དོ་ཞེ་
སྡང་རྡོ་རྗེའི་ཤོག་རིལ་བཞུགས་སོ། །ཨུ་བརྒྱན་(རྒྱན་)གྱི་གདམས་པ། [བར་དོ་ལ་བཞེད་ཚུལ་འབིར་བས། བར་དོ་བཞི་རུ་མཛད། ན་རོ་ནི་གུ་བར་དོ་གསུམ་དུ་མཛད། མིད་ལ་རས་པ་རྒྱས་པར་ཕྱེད་ཏེ་(དེ་)བར་དོ་དྲུག་དུ་(ཏུ་)མཛད། སྐར་
མ་པས་བཞི་རུ་མཛད། མི་དྲི་ལྟ་བསྒོམ་སྤྱོད་པའི་བར་དོ་གསུམ་དུ་མཛད། ཕ་དམ་པས་བར་དོ་གསུམ་དུ་མཛད། སློབ་དཔོན་དགའ་རབ་རྡོ་རྗེས་བར་དོ་གསུམ་དུ་མཛད། པཎ་ཌི་ཏ་ཤྲི་སིང་ཧས་དྲུག་དུ་མཛད་དོ། །]མཁའ་འགྲོ་
མ་ཐམས་ཅད་ཀྱི་ཡང་སྙིང་། རྒྱུད་ཐམས་ཅད་ཀྱི་སྙིང་པོ་བསྡུས་པ། གསེར་ཞུན་དྲིལ་བ་ལྟ་བུའི་མན་ངག་དེ་ཡང་། དཔལ་ན་རོ་པ་ཆེན་པོའི་བཞེད་ཀྱིས། བཅོམ་ལྡན་འདས་[བཅོམ་ལྡན་འདས་ཀྱི་སྒྲ་
1-4-49b

དོན་ནི། རྡོ་རྗེ་རྩེ་མོ་ལས། ཉོན་མོངས་ལས་དང་དེ་བཞིན་སྐྱེ། །མི་མཐུན་ཕྱོགས་ཀྱི་ཆོས་རྣམས་གང་། །དེ་བཅོམ་པས་{-ན་-}བཅོམ་ཞེས་བརྗོད། །དབང་ཕྱུག་དང་ནི་གཟུགས་བཟང་དང་། །དཔལ་དང་གྲགས་དང་ཡེ་ཤེས་དང་། །བརྩོན་འགྲུས་
ཕུན་སུམ་ཚོགས་པ་སྟེ། །དྲུག་པོ་དེ་ལ་ལྡན་ཞེས་བྱ། །ཅེས་(ཞེས་)སོ། །འདས་ཞེས་པ་ནི། འཇིག་རྟེན་གྱི་ལེགས་ལྡན་དུ་མར། ཁྱད་པར་དུ་བྱ་བའི་སྟོན་གྱི་མཁས་པ་རྣམས་ཀྱིས་བསྟན་པའོ། །]གདན་ཁྲི་བཞིའི་ལུང་གཙོ་བོར་སྟོན་པ།
དེ་ཡང་གང་ཞིག་སྐྱེ་བ་ཀུན་རྫོབ་བདེན་ཞེས་ཏེ། །འཆི་བའི་མིང་ཡང་དོན་དམ་བདེན་པ་ཡིན། །རིམ་གཉིས་འདི་དག་བླ་མའི་དྲིན་གྱིས་ནི། །རྙེད་པ་འདི་ནི་མ་འོངས་སངས་རྒྱས་ཡིན། །ཞེས་
པའི་ལུང་འདིར་སྨོས་ཏེ། དེ་ཡང་རྩ་རྡོ་རྗེ་ཐོད་སྦྱོར་གྱི་མན་ངག །རླུང་རྡོ་རྗེ་ཐོད་སྦྱོར་གྱི་མན་ངག །ཐིག་ལེ་རྡོ་རྗེ་ཐོད་སྦྱོར་གྱི་མན་ངག་དང་གསུམ་ཡིན་ཏེ། དེ་ཡང་། རྒྱལ་པོ་མཆོག་གསུམ་
དེ་རབ་མཆོད། །མན་ཏྲ་ཨ་ས་ང་ལ་དྲིས། །ཞེས་པས། དཀྱིལ་འཁོར་རྒྱལ་མཆོག་ལྷ་རྒྱལ་མཆོག །སྔགས་ཀྱི་རྒྱལ་མཆོག་དང་གསུམ་ཡིན། །འདིར་ཡང་རྡོ་རྗེའི་ལུས་འདི་ལ། །རང་བཞིན་སྡེ་པ་
བཞི་གནས་ཏེ། །དེ་ན་ལྷ་བཞི་གནས་པའོ། །དེ་དེ་རྣམས་ནི་འཆི་བ་ནི། །སྤོང་ངམ་ཀུན་རྫོབ་བདེན་པའོ། །དེ་ལས་བར་དོ་འབྱུང་བ་སྟེ། །ལུས་ཅན་ཐམས་ཅད་འཆི་བའི་ཚེ། །སྣང་བ་འཚམས་(མཚམས་)ནི་འདི་
1-4-50a

ལྟར་སྦྱོར། །གཟུགས་ཀྱི་ཕུང་པོ་ཐིམ་པས་ནི། །ལུས་ཀྱི་སྟོབས་ཉམས་ཆུང་དུ་འགྲོ། །མཉམ་ཉིད་ཡེ་ཤེས་ཐིམ་པས་ནི། །དབང་ཆེན་དཀྱིལ་འཁོར་ཉིད་ལའོ། །ལུས་པོ་
སྒུལ་བསྐྱོད་མི་ནུས་ཤིང་། །མིག་གི་དབང་པོ་འགགས་པ་ཡིས། །རང་ལུས་མདངས་དང་མི་ལྡན་འགྱུར། །ཡུལ་གཟུགས་ཐམས་ཅད་མི་གསལ་ལོ། །རིན་ཆེན་མགོན་པོའི་རིགས་ཅན་གྱི། །
ལྷ་རྣམས་ཐམས་ཅད་སྐད་ཅིག་གིས། །དོན་དམ་དཀྱིལ་འཁོར་ཉིད་དུ་འཇུག །ཚོར་བའི་ཕུང་པོ་ཐིམ་པས་ནི། །ཚོར་བ་ཉམས་སུ་མི་མྱོང་ངོ་། །མེ་ལོང་ལྟ་བུའི་ཡེ་ཤེས་ཐིམ། །ཆུ་ཡི་དཀྱིལ་འཁོར་
ཉིད་ལའོ། །ལུས་པོ་སྐམས་པར་འགྱུར་བ་ཡིན། །རྣ་བའི་དབང་པོ་ཐིམ་པས་ན། །སྒྲ་མི་ཐོས་ཤིང་སྒྲ་ཡུལ་འགག །རྡོ་རྗེ་མགོན་པོའི་རིགས་ཅན་གྱི། །ལྷ་རྣམས་ཐམས་ཅད་སྐད་ཅིག་གིས། །དོན་དམ་
དཀྱིལ་འཁོར་ཉིད་དུ་འཇུག །འདུ་ཤེས་ཕུང་པོ་ཐིམ་པས་ན། །སེམས་ཅན་དྲན་པར་མི་འགྱུར་རོ། །དྲི་ཡུལ་ཐིམ་པས་བྲོ་མི་འགྱུར། །སོ་སོར་རྟོག་པའི་ཡེ་ཤེས་ཐིམ། །འགྲོ་བ་རྣམས་ནི་མི་དྲན་ནོ། །མེའི་
དཀྱིལ་འཁོར་ཉིད་ཐིམ་མོ། །ཁ་ཟས་ཐམས་ཅད་མི་འཇུ་ཞིང་། །སྣ་ཡི་དབང་པོ་ཐིམ་པས་ཏེ། །སྟེང་རླུང་དལ་གྱིས་འགྲོ་བར་འགྱུར། །པདྨའི་མགོན་པོའི་རིགས་ཅན་གྱི། །ལྷ་རྣམས་ཐམས་ཅད་སྐད་ཅིག་
1-4-50b

གིས། །དོན་དམ་དཀྱིལ་འཁོར་ཉིད་དུ་འཇུག །འདུ་བྱེད་ཕུང་པོ་ཐིམ་པས་ན། །ལུས་ཀྱི་བྱ་བ་ཐམས་ཅད་ལ། །ཡིད་ནི་འཇུག་པར་མི་འགྱུར་ཏེ། །བྱ་བ་གྲུབ་པའི་ཡེ་ཤེས་ཐིམ། །དགོངས་པ་དྲན་པར་
མི་འགྱུར་རོ། །རླུང་གི་དཀྱིལ་འཁོར་ཐིམ་པས་ནི། །རླུང་བཅུ་རང་གི་གནས་ན་ཕྲོ། །ལྕེ་ཡི་དབང་པོ་ཐིམ་པས་ནི། །ཐུང་དང་རྩ་བ་མངོན་པར་འགྱུར། །རོ་ཡི་ཡུལ་རྣམས་ཐིམ་པས་ནི། །རོ་དྲུག་ཉམས་སུ་
མི་མྱོང་ངོ་། །ལས་ཀྱི་མགོན་པོའི་རིགས་ཅན་གྱི། །ལྷ་རྣམས་ཐམས་ཅད་སྐད་ཅིག་གིས། །དོན་དམ་དཀྱིལ་འཁོར་ཉིད་དུ་འཇུག །རྣམ་པར་ཤེས་པའི་ཕུང་པོ་ནི། །སྣང་བྱེད་ཐོབ་གསུམ་རིམ་པ་
ཡིས། །གཅིག་ལ་གཅིག་ཉིད་ཐིམ་པས་ནི། །འོད་གསལ་མངོན་དུ་བྱེད་པར་འགྱུར། །ཆོས་ཀྱི་དབྱིངས་ཀྱི་ཡེ་ཤེས་ཞེས། །དེ་ལ་བྱས་ཏེ་སྤྲོས་དང་བྲལ། །ནམ་མཁའི་ཁམས་ཀྱི་དཀྱིལ་འཁོར་ནི། །
འདུས་མ་བྱས་པའི་མཚན་ཉིད་ཅན། །ལུས་ཀྱི་དབང་པོ་ཐིམ་པས་ནི། །སྟོང་ཉིད་རྡོ་རྗེའི་སྐུ་ཐོབ་པས། །ཡུལ་ནི་རེག་བྱའི་རྟོག་དང་བྲལ། །རྣམ་སྣང་མགོན་པོའི་རིགས་ཅན་གྱི། །ལྷ་རྣམས་ཐམས་
ཅད་སྐད་ཅིག་གིས། །དོན་དམ་དཀྱིལ་འཁོར་ཉིད་དུ་འཇུག །དེ་ལྟར་ཕུང་པོ་ལྔ་དང་ནི། །ཡེ་ཤེས་ལྔ་དང་འབྱུང་བ་ལྔ། །དབང་པོ་ལྔ་དང་ཡུལ་ལྔ་པོ། །དེ་དག་ཐམས་ཅད་འོད་གསལ་གྱི། །དཀྱིལ་འཁོར་
1-4-51a

ཉིད་དུ་འཇུག་པ་ལ། །དཀྱིལ་འཁོར་རྒྱལ་མཆོག་ཅེས་བྱའོ། །དབང་པོ་རབ་ཀྱི་གང་ཟག་གིས། །དཀྱིལ་འཁོར་རྒྱལ་མཆོག་འོད་གསལ་གྱི། །བར་དོ་དང་པོ་སངས་རྒྱས་པའི། །
མན་ངག་ན་རོ་ཆེན་པོའི་གཞུང་། །ཆོས་ཀྱི་སྐུའི་མན་ངག་གོ། །གཉིས་པ་སྒྱུ་མའི་སྐུར་ལྡང་བའི། །དག་དང་མ་དག་རྣམ་གཉིས་པོ། །དག་པ་རྒྱལ་བའི་ཞིང་ཁམས་དང་། །རང་ལུས་ཡི་དམ་ལྷར་གསལ་ན། །
འོད་གསལ་མེ་ཡི་དངོས་པོ་ཡིས། །བག་ཆགས་ཐམས་ཅད་བསྲེགས་པས་ན། །བརྟན་པ་ཐོབ་དང་སྤེལ་སྦྱངས་ཀྱི། །དགོས་པ་འགྲུབ་པ་འགྱུར་བ་ཡིན། །མ་དག་སྐྱེ་བོའི་བར་དོ་ནི། །ལས་ངན་རྣམ་སྨིན་འཐུག་
པ་དང་། །མ་རིག་པ་ཡི་དབང་གིས་སུ། །དམྱལ་བར་དེ་ཉིད་སྐྱེ་བ་འབྱུང་། །ས་རླུང་ཐུར་ལ་ལོག་པ་ཡིས། །ཁྲོན་པ་གཏིང་རིང་དཔག་ཚད་ཀྱི། །ནང་དུ་རང་ལུས་སྤྱི་ཚུགས་སུ། །ལོག་གིས་སོང་སྟེ་ཐུར་དུ་
ལྷུང་། །དབང་ཆེན་ས་ཡི་དཀྱིལ་འཁོར་སྟེ(ཏེ)། །ཁོ་ལ་དམྱལ་བའི་རྣམ་པར་འཆར། །རྟོགས་ན་རྡོ་རྗེ་མགོན་པོ་ཡིན། །འཁྱགས་པས་ཡིད་གདུངས་ཤིན་དུ་(ཏུ་)མནར། །ཆུ་ལ་སྡང་ཞིང་མེ་ལ་ཆགས། །ཆགས་
སྣང་(སྡང་)གཉིས་ཀྱིས་འཚམས་(མཚམས་)སྦྱར་ནས། །མེ་རླུང་ཐུར་ལ་ལོག་པ་ཡིས། །འཁྱགས་ནས་མེའི་དྲུང་དུ་ཕྱིན། །ཉོན་མོངས་རླུང་གི་རང་བཞིན་གྱིས། །ཆགས་པས་མི་སྐྱོད་འཇིག་རྟེན་ཁམས། །མེ་ཡི་རང་
1-4-51b

བཞིན་ཉིད་དུ་འབར། །མེ་རླུང་ཁོ་ལ་ཕོག་པ་ཡི། །ཞེ་སྡང་སྡུམས་ཀྱི་སྐྱེ་བ་ཡིན། །དབང་ཆེན་མེ་ཡི་དཀྱིལ་འཁོར་དེ། །ཁོ་ལ་དམྱལ་བའི་སྣང་བར་འཆར། །རྟོགས་ན་པདྨ་མགོན་པོ་ཡིན། །ཚ་བས་ཡིད་གདུངས་
ཤིན་དུ་(ཏུ་)མནར། །མེ་ལ་སྡང་ཞིང་རླུང་ལ་ཆགས། །ཆགས་སྡང་གཉིས་ཀྱིས་འཚམས་(མཚམས་)སྦྱར་ནས། །རླུང་གི་རླུང་ཉིད་ཐུར་ལ་ལོག །ཚ་ནས་རླུང་ལ་ཕྱར་བས་སུ། །ཆགས་པས་རླུང་གི་རང་བཞིན་དུ། །འཇིག་རྟེན་
ཁམས་ཀུན་རླུང་དུ་འཁྲུགས། །རླུང་གིས་བསྐྱོད་པས་རང་དབང་མེད། །ངན་སོང་གསུམ་དུ་འཁྱམས་དོགས་པས། །དབང་ཆེན་རླུང་གི་དཀྱིལ་འཁོར་དེ། །ཁོ་ལ་དམྱལ་བའི་སྣང་བ་འཆར། །རྟོགས་ན་
ལས་ཀྱི་མགོན་པོ་ཡིན། །འཁྲུལ་པས་ཡིད་གདུངས་ཤིན་དུ་(ཏུ་)མནར། །ཡི་མུག་རང་གི་ལུས་པོ་ལ། །གསོད་གཅོད་མཚོན་ཆ་ལ་སོགས་པ། །ལྕིབ་པའི་འདུ་ཤེས་བྱུང་ཙམ་ན། །ཕྱོགས་ཀྱི་གཤིན་རྗེ་ཆེན་པོ་
བཞིས། །སྐད་ཅིག་ཉིད་ལ་སླེབ་ནས་སུ། །རང་གིས་རང་ཉིད་མ་བསད་ཅིག །དེ་འདྲའི་ལས་ལ་ཁོ་བདག་མཁས། །བྱེད་པའི་འབྱུང་ཁུང་(ཁུངས་)འདི་ན་ཡིད། །སྟ་རེས་ཤོག་གམ་སོག་ལེས་འདྲ། །གསོར་གྱིས་
འབུགས་སམ་ཐོ་བས་བརྡུང་། །རལ་གྲི་སྤུ་གྲིའི་ཚལ་གསེབ་ཏུ། །ཁྱོད་ཉིད་དགའ་བའི་ལས་བྱའོ། །ཟེར་ཏེ་ཡང་འདྲུད་མར་བཤལ་བྱེད། །སྡུག་བསྔལ་དཔག་མེད་ཉམས་སུ་མྱོང་། །མི་བཟད་རྩུབ་པའི་
1-4-52a

པའི་ལས་སྤྱད་པས། །བཟོས་པར་དཀའ་བ་ཉམས་སུ་མྱོང་། །ཤིན་དུ་(ཏུ་)མི་བཟོད་ཆོ་ངེས་འདེབས། །སྐྱབས་གནས་སྐྱེལ་མ་ཏུར་རེ་དྲན། །བླ་མ་མཆོག་ལ་རབ་གུས་པའི། །འདུ་
ཤེས་སྐད་ཅིག་སྐྱེས་པ་ན། །སྐད་ཅིག་ཉིད་ལ་ཐར་བར་ངེས། །སྤྱི་བོའི་གཙུག་གམ་སྙིང་དཀྱིལ་དུ། །བླ་མ་རྟག་ཏུ་དྲན་པ་གཅེས། །རི་ཡི་ནོན་དང་ཁྲོན་པའི་ནང་། །མ་དག་པ་ཡི་སྣང་བ་ལ། །ས་འབུམ་ཤིན་
དུ་(ཏུ་)ཆེ་བ་གཅིག །རིན་ཆེན་མགོན་པོའི་ཕོ་བྲང་དུ། །བསམས་ཏེ་རང་ཉིད་བསྐོར་བར་བྱ། །རད་ནེ་རད་ནེའི་སྔགས་བཟླས་ཤིང་། །མོས་དང་གུས་པའི་ཡིད་ཀྱིས་སུ། །གསོལ་བ་ཤིན་དུ་(ཏུ་)དྲག་ཏུ་གདབ། །སྡུག་
བསྔལ་གྲོལ་འགྱུར་ཐེ་ཚོམ་མེད། །རྒྱ་མཚོ་མེ་དང་ཆུ་རླུང་གིས། །ཆུ་རླུང་དགྲ་རུ་ཤར་བ་ན། །དཀྱིལ་འཁོར་དབུས་ཀྱི་བུམ་པ་ལ། །མི་བསྐྱོད་པ་ཡི་ཕོ་བྲང་དུ། །བསམས་ཏེ་བཏུང་དེང་ཁྲུས་བྱས་ན། །ཀཾ་ཀ་ནེ་ཡི་
སྔགས་བཟླས་ཤིང་། །དད་གུས་ཤིན་དུ་(ཏུ་)དྲག་པོ་ཡིས། །བར་ཆད་མེད་པའི་གསོལ་བ་གདབ། །སྡུག་བསྔལ་ཆེ་ལས་གྲོལ་བར་འགྱུར། །མེ་རླུང་དྲག་པོས་བསྐྱོད་པ་དང་། །སྣང་བ་མེ་རུ་འབྱུང་བ་ན། །དུར་ཁྲོད་
མགོན་པོའི་མེ་དེ་ཉིད། །པདྨ་མགོན་པོའི་ཕོ་བྲང་དུ། །མོས་པས་བསམས་ཏེ་རང་ཉིད་ཀྱི། །སྡིག་སྒྲིབ་ཐམས་ཅད་བསྲེགས་པར་བསམ། །དད་གུས་དྲག་པོ་ཤིན་དུ་(ཏུ་)གཅེས། །ཚེ་དཔག་མེད་ཀྱི་སྔགས་
1-4-52b

བཟླས་ཤིང་། །གསོལ་བ་ཡང་ནས་ཡང་དུ་གདབ། །རླུང་འཚུབ་ཆེན་པོ་བྱུང་དུས་སུ། །དགྲ་ཡི་སྣང་བ་ཤར་ཙམ་ན། །ནང་དུ་རྔུབ་པའི་སྦྱོར་བ་ཡིས། །ཕྱི་ཡིས་འཚུབ་མ་ཞི་བར་བསམ། །སྤྱི་བོར་དོན་ཡོད་གྲུབ་པ་ཡི། །
ཕོ་བྲང་བཏབ་ལ་མོས་གུས་བྱ། །དབྱངས་ཡིག་བཅུ་དྲུག་སྔགས་སུ་བགྲང་། །ཡེངས་པ་མེད་པའི་བསམ་གཏན་བྱ། །གོང་ནས་རང་ལུས་ཐམས་ལྡན་གཅེས། །ལྷ་དང་སྔགས་སུ་ངེས་པ་ཡིས། །རྒྱལ་
མཆོག་གཉིས་སུ་འདོད་པ་ཡིན། །གོང་ནས་འདུན་པ་དྲག་པོ་གཅེས། །སེར་སྣ་ཆེ་ལ་གོམས་པ་ཡིས། །ཡི་དྭགས་ཉིད་དུ་སྐྱེ་བ་ན། །མི་མེད་བྱང་ཐང་སྟོང་པ་ན། །ཉི་མ་གྲང་མོར་འཆར་བ་ན། །ཟླ་བ་ཚ་མོར་
འཆར་བ་འབྱུང་། །མྱ་ངན་ཐང་གི་དཀྱིལ་ཉིད་དུ། །ཆུ་མེད་གྲང་བ་སྐམ་པོ་སྐྲོག །སྐོམ་པས་ཆུ་ཡིས་ཡིད་གདུངས་ཏེ། །ཟས་ཀྱི་རྣམ་པ་མི་མྱོང་ཞིང་། །མཚོན་ཆ་ཐོགས་པས་བསྲུང་པ་དང་། །དྲི་ང་སྣག་(རྣག་)ཁྲག་
ཉིད་དུ་མཐོང་། །ཟས་སྐོམ་སྐབས་སུ་མཐོང་ན་ཡང་། །ཟ་དང་འཐུང་བ་མི་ཤེས་ཤིང་། །འཁྱིགས་པ་བཞིན་དུ་གསལ་བར་འོང་། །ལུས་པོ་སྐྲེན་(བཀྲེན་)དང་རྒུར་(སྒུར་)བ་ཡིས། །སྟོབས་ཉིད་ཤིན་དུ་(ཏུ་)ཆུང་པར་འོང་། །ཁོང་
པར་ལྕགས་བསྲེགས་བཅུག་འདྲ་འབྱུང་། །ཁ་ནས་དུད་པ་འཐུལ་བ་དང་། །རུས་མགོ་ལྤགས་ཀྱིས་བཏུམས་པ་དང་། །དུར་ཁྲོད་ཀེང་རུས་འདྲ་བའི་མདོག །རང་ལུས་གཞན་ལུས་དེ་ལྟར་སྣང་། །ཡི་དྭགས་
1-4-53a

ཉིད་དུ་སྐྱེ་བས་ན། །དགག་པའི་ཐབས་ནི་འདི་བཞིན་བསྒོམ། །རང་ཉིད་ཐུགས་རྗེ་ཆེན་པོར་བསྐྱེད། །འཇིག་རྟེན་ཁམས་ཀྱི་ལོངས་སྤྱོད་ཀུན། །བློ་ཡིས་བླངས་ལ་སྦྱིན་པར་བཏང་། །
ལ་ལས་བླ་མ་དཀོན་མཆོག་མཆོད། །སྒྱུ་མ་ལྟ་བུར་བརྟན་པའི་བློས། །གང་ལའང་ཞེན་པ་མེད་པར་བྱ། །གཏི་མུག་ཆེ་ལ་གོམས་པ་ཡིས། །དུད་འགྲོ་ཉིད་དུ་སྐྱེ་བས་ན། །ཕྱེད་དང་བཞིའི་ཕྱི་མ་ལ། །གར་སྐྱེའི་
ལུས་སུ་འགྱུར་ནས་འགྲོ། །ཆུ་ལ་གནས་པའི་དུད་འགྲོ་རུ། །གལ་ཏེ་སྐྱེ་ན་ཆུ་དེ་ཉིད། །གཞལ་ཡས་ཁང་དུ་མཐོང་ནས་འོང་། །ས་སྟེངས་གནས་པའི་དུད་འགྲོ་རུ། །སྐྱེ་ན་དུད་འགྲོ་ཕ་མར་མཐོང་། །ཆགས་
སྡང་གཉིས་ཀྱིས་འཚམས་(མཚམས་)སྦྱར་ནས། །ཁྱོ་དང་ཆུང་མའི་འདུ་ཤེས་འབྱུང་། །དུས་དེར་མངལ་ནི་བསྡམ་པར་གཅེས། །སྔོན་ཡང་འདི་འདྲས་འཁོར་བར་འཁྱམས། །ད་ནི་གནས་ཅིག་ལེགས་བསྡམས་
ལ། །ལམ་སྦྱོང་ཆོས་ལ་ཡིད་འཇུག་ཕྱིར། །རྒྱལ་རིགས་ཤིང་ཆེན་ས་ལ་སོགས། །སེམས་ཅན་དོན་བྱེད་ནུས་པ་ཡི། །ལུས་གཅིག་ལེན་པའི་མན་ངག་ཡིན། །རིགས་གསུམ་ལས་བྱེད་ཅེས་བྱའོ། །
ཆོས་ལྡན་རིགས་སྐྱེ་སྨོན་ལམ་བཏབ། །བར་དོ་གསུམ་པ་མངལ་སྒོ་དགག་པ་ནི། །བར་དོ་ཕ་མ་འདུ་འཕྲོད་བྱེད་དུས་དེར། །དབང་དུས་བླ་མ་ཡབ་ཡུམ་སྒོམ་པ་ཡིས། །བདེ་སྟོང་ཆོས་སྐུར་དྲན་
1-4-53b

པར་བྱ། །ཕྲག་དོག་མིག་སེར་མི་འབྱུང་པར། །མཁའ་སྤྱོད་གནས་སུ་འགྲོ་བར་འགྱུར། །བར་དོའི་གདམས་པ་དེ་རྣམས་ཀྱང་། །ད་ལྟར་ཉིད་ནས་སྦྱང་ཞིང་བསྒོམ། །བར་དོ་གཉིས་ཀྱི་དུས་འདི་རུ། །དྲན་
འདུན་དྲག་པོ་ཡེངས་མེད་གྱིས། །གཞན་ལ་མ་སྤེལ་སྦས་པའོ། །པུ་ལ་ཧ་རིའི་ན་རོ་མལ་ལས་རྙེད་པའོ། །ཨྠིྀ།། །།


目录
བར་དོ་ཞེ་སྡང་རྡོ་རྗེའི་ཤོག་རིལ།